البنت زى الولد ماهيش كمالة عدد....

.




السلام عليكم
طبعا الله يرحمها سعاد حسنى هى اللى غنت الاغنية دى ....بس انا ممكن اثبتلكم ان البنت مش زى الولد ...خليكو معايا





المثل بيقول (اعز الولد ,,ولد الولد )ومسمعناش مثل بيقول اعز الولد بنت البنت.


البنت لما تتعاكس فى الشارع تبص للولد وتقوله هو انت معندكش اخوات بنات ياكابتن ،ومع ذلك لما بنت تعاكس ولد مينفعش يقولها هو انتى معندكيش اخوات ولاد يا موزة.


الولد ممكن يقعد عند الميكانيكى ويصطبح بكباية شاى,البنت ماينفعش تقعد عند الميكانيكى.


الولد لو مسافر خمس ايام كل اللى محتاجه معاه بنظلون جينز وتى شيرتين وجيل وفرشة اسنان يرميهم فى الشنطة اللى على كتفه وخلصنا ،البنت لو مسافرة خمس ايام تاخد معاها شنطتين من بتوع واحد مسافر الكويت.


الولد ممكن يفك الانبوبه وينزل يغيرها وكمان يركب الانبوبة الجديدة ،البنت بالكتير اوى ممكن تصرخ وهيا فى المطبخ ...ياماااااااااااامااااااا� �ا الانبوبة خلصت.


لو فيه موسيقى شغالة صعب ان فيه حد يقول للولد قوم ارقص شوية.


الولد ممكن يقلع جزمته فى الشارع ويديها للراجل بتاع الورنيش عشان يلمعها ،مستحيل البنت تعمل كده.


الولد ممكن يرقص فى الشارع فى زفة ابن عمه،البنت اخرها تقف تسقف وتزغرد وتحترم نفسها.


البنت لما تحط مكياج تبقى احلى ،الولد لو حط مكياج يبقى بلياتشو.


دايما فى المترو او الاتوبيس او الميكروباص الولد هو اللى بيقوم عشان يقعد البنت لو واقفة ،عمرنا ماشفنا بنت بتقوم وتقعد ولد.


الولد مش مضطر يمشى بشنطة .





لو البنت زى الولد،ماكنوش عملوا فى البطاقة خانة اسمها النوع ولازم تكتب قدامها بوضوح ذكر او انثى.


بعد كل ده والست سعاد حسنى بتقولك البنت زى الولد ......





.